Starfskjarastefna Brimborgar ehf. Prenta þessa síðu

Tilv. : HRM-L-26
Dags: 27.1.2011
Útgáfa. : 1

1. Markmið

   1.1  Markmið starfskjarastefnu Brimborgar er að laða hæfustu stjórnendur og starfsmenn að fyrirtækinu og halda þeim í starfi, enda er það lykilforsenda vaxtar og viðgangs félagsins.
   1.2  Þá er stefnu þessari ætlað að veita hluthöfum aukna innsýn í og áhrif yfir stefnu félagsins varðandi starfskjör stjórnenda og stjórnarmanna.
   1.3  Félagið telur æskilegt að tengja starfskjör stjórnarmanna og æðstu stjórnenda (forstjóra, framkvæmdastjóra og næstu undirmanna) við (a) persónulegan árangur þeirra í starfi, (b) afkomu og árangur félagsins á hverjum tíma og (c) langtímahagsmuni hluthafa.
   1.4  Starfskjarastefnan er bindandi fyrir félagsstjórnina að því er varðar ákvæði um kaupréttarsamninga og hvers konar samninga eða greiðslur er fylgja þróun verðs á hlutabréfum í félaginu. Að öðru leyti er starfskjarastefnan leiðbeinandi fyrir félagið og stjórn þess. Frávik frá starfskjarastefnunni skulu rökstudd sérstaklega í hverju tilviki og færð til bókar.
   
   

2. Þóknun stjórnarmanna

   2.1  Stjórnarmönnum skulu greidd laun í samræmi við ákvörðun aðalfundar ár hvert.  Stjórn gerir tillögu um stjórnarlaun fyrir komandi starfsár og skal í þeim efnum taka mið af þeirri ábyrgð sem á stjórnarmönnum hvílir, þeim tíma sem stjórnarstörf krefjast og afkomu félagsins.
   2.2  Félagið endurgreiðir ferðakostnað til stjórnarmanna sem þurfa að ferðast milli landa til að mæta á stjórnarfundi.  Reglur um endurgreiðslur skulu nánar tilteknar í starfsreglum stjórnar.
   
   

3. Starfskjör forstjóra

   3.1  Stjórn félagsins skal gera skriflegan ráðningarsamning við forstjóra. Skal þess gætt að samningur sé að öllu jöfnu ekki til lengri tíma en 5 ára í senn. Heimilt er að endurnýja ráðningarsamning forstjóra á gildistíma hans. Heimilt er að semja við forstjóra um upphafsgreiðslu vegna ráðningar hans til félagsins.
   3.2  Grunnlaun og aðrar greiðslur til forstjóra skulu taka mið af hæfni, ábyrgð og umfangi starfans, og þeim kjörum sem tíðkast á íslenskum markaði, þó þannig að heildarkjörin séu samkeppnishæf á alþjóðamarkaði.
   3.3  Heimilt er að semja um kaupauka og hvatagreiðslur fyrir forstjóra sem taki mið af afkomu félagsins, árangri hans í starfi og öðrum þeim sjónarmiðum sem sett eru fram í grein 4.1.
   3.4  Með það að markmiði að tengja saman hagsmuni forstjóra og hluthafa skal stjórn heimilt að gera kaupréttarsamning við forstjóra um hluti í félaginu og/eða veita honum lán vegna kaupa á hlutum í félaginu innan þeirra marka sem lög leyfa.
   3.5  Stjórn félagsins fer árlega sérstaklega yfir og metur frammistöðu forstjóra og setur honum markmið. Launakjör og hvatagreiðslur forstjóra eru endurskoðuð árlega og skal þá höfð hliðsjón af áðurnefndu mati, þróun launakjara almennt í sambærilegum fyrirtækjum og afkomu félagsins.
   3.6  Önnur starfskjör skuli vera svo sem tíðkanleg eru hjá sambærilegum fyrirtækjum, svo sem greiðslur í lífeyrissjóð, orlof og uppsagnarfrestur.
   3.7  Við ákvörðun uppsagnarfrests í ráðningarsamningi má hafa sérstök ákvæði um lengd uppsagnarfrests sem tekur mið af starfstíma forstjóra, þó að hámarki 12 mánuði.
   3.8  Við gerð ráðningasamnings við forstjóra skal haft að leiðarljósi að ekki komi til frekari greiðslna við starfslok en fram koma í ráðningasamningi. Heimilt er þó að gera sérstakan starfslokasamning við starfslok forstjóra enda þjóni slíkur samningur hagsmunum félagsins að mati stjórnar.
   
   

4. Kaupaukar og hvatagreiðslur

   4.1  Heimilt er að greiða lykilstjórnendum félagsins kaupauka eða hvatagreiðslur í formi reiðufjár eða hlutafjár. Kaupaukar skulu miðast við að lykilstjórnendur séu á samkeppnishæfum kjörum, frammistöðu viðkomandi starfsmanns, afkomu félagsins, mikilvæga áfanga í rekstri og starfsemi félagsins að öðru leyti þar á meðal hvort settum markmiðum hefur verið náð. Kaupauki skal háður því skilyrði að starfsmaður láti ekki af störfum í að minnsta kosti sex mánuði eftir að slík greiðsla fór fram.
   
   

5. Kaupréttir

   5.1  Heimilt er að veita starfsmönnum kauprétt að hlutum í félaginu með það að markmiði meðal annars að hagsmunir þeirra, félagsins og hluthafa fari sem best saman. Almennt skal miðað við að kaupréttir séu til 2 – 5 ára og að þeir séu nýtanlegir í áföngum á tímabilinu, að því gefnu að viðkomandi sé enn á launaskrá. Við ákvörðun kaupréttargengis skal almennt miða við síðasta viðskiptagengi sem stjórn er kunnugt um eða mat stjórnar á sanngjörnu markaðsvirði hlutafjárins.
   
   

6. Upplýsingagjöf á aðalfundi

   6.1  Á aðalfundi skal stjórn gera grein fyrir úthlutuðum og innleystum kauprétti, annars konar greiðslum sem tengjast hlutabréfum í félaginu, og starfslokagreiðslum ef einhverjar eru.
   
   

7. Samþykkt starfskjarastefnu

   7.1  Starfskjarastefna félagsins skal endurskoðuð og samþykkt árlega á aðalfundi.
   7.2  Starfskjarastefna þessi er sett fram á íslensku og ensku.  Komi upp ágreiningur um túlkun ræður íslenska útgáfan.
   7.3  Framangreind starfskjarastefna Brimborgar ehf. er samþykkt í samræmi við 99. gr. laga nr. 138/1994 um einkahlutafélög.

Samþykkt á aðalfundi Brimborgar ehf. 27. janúar 2011

[ Stjórn og aðalskipurit » ]

[ Starfsreglur stjórnar Brimborgar » ]

[ Stjórnháttayfirlýsing » ]